പരിസ്ഥിതി ദിനത്തിന്റെ ഭാഗമായി കാർബൺ പുറന്തള്ളലിന്റെ അളവ് കുറയ്ക്കുക എന്ന ലക്ഷ്യത്തോടെ തദ്ദേശ സ്വയംഭരണ വകുപ്പ് ഗ്രീൻ കേരള റൈഡ് സംഘടിപ്പിച്ചു. പൊതുഗതാഗത സംവിധാനങ്ങളെ പ്രോത്സാഹിപ്പിക്കുക, സ്വകാര്യ വാഹനങ്ങളുടെ ഉപയോഗം കുറയ്ക്കുക, വെഹിക്കിൾ പൂളിങ്, കമ്മ്യൂണിറ്റി പൂളിങ്, ഇലക്ട്രിക്ക് വാഹനങ്ങളുടെ ഉപയോഗം പ്രോത്സാഹിപ്പിക്കുക തുടങ്ങിയ ബോധവത്ക്കരമാണ് പരിപാടി കൊണ്ട് മുഖ്യമായും ഉദ്ദേശിച്ചത്. പരിപാടിയുടെ സംസ്ഥാന തല ഉദ്ഘാടനം എൽ. എസ്. ജി. ഡി പ്രിൻസിപ്പൽ ഡയറക്ടർ ഡോ. ചിത്രാ എസ് ഐ. എ.എസ് നിർവഹിച്ചു. തമ്പാനൂരിൽ നിന്നും നന്തൻകോട് സ്ഥിതി ചെയ്യുന്ന എൽ. എസ്. ജി. ഡി പ്രിൻസിപ്പൽ ഡയറക്ടറേറ്റ് ഓഫീസിലേക്ക് എത്തുന്ന ജീവനക്കാർക്കായി ക്രമീകരിച്ച കെ. എസ്. ആർ.ടി.സി ഇലക്ട്രിക്ക് ബസ്സിന്റെ പ്രത്യേക സർവീസ് ഫ്ലാഗ് ഓഫ് ചെയ്തു കൊണ്ടാണ് ഉദ്ഘാടനം നിർവഹിച്ചത്. വയനാട് ജില്ലാ കളക്ടർ മേഘശ്രീ ഡി.ആർ ഐ.എ.എസ്, പത്തനംതിട്ട ജില്ലാ കളക്ടർ പ്രേം കൃഷ്ണൻ ഐ.എ.എസ് എന്നിവർ കളക്ടറേറ്റിലേക്കുള്ള യാത്രയ്ക്കായി ഔദ്യോഗിക വാഹനങ്ങൾ ഉപേക്ഷിച്ച് പൊതുഗതാഗത സംവിധാനം ഉപയോഗിച്ച് പരിപാടിയുടെ ഭാഗമായി. സംസ്ഥാനത്തെ വിവിധ തദ്ദേശ സ്ഥാപനങ്ങളിലെ ജീവനക്കാർ കാൽനടയായും, സൈക്കിളിലും, ഇലക്ട്രിക്ക് വാഹനങ്ങളിലും, വെഹിക്കിൾ പൂളിങ് അനുവർത്തിച്ചും മാതൃക സൃഷ്ട്ടിച്ചു.
