അഠല്‍ മിഷന്‍ ഫോര്‍ റിജുവിനേഷന്‍ ആന്‍റ് അര്‍ബന്‍ ട്രാന്‍സ്ഫര്‍മേഷന്‍ മിഷനാണ് അമൃത് മിഷന്‍ എന്ന ചുരുക്കപ്പേരില്‍ അറിയപ്പെടുന്നത്. എല്ലാ വാസഗൃഹങ്ങളിലും ജലവിതരണത്തിനായുള്ള ഒരു ടാപ്പും ജലവിതരണവും മലിനജല നിര്‍ഗമനത്തിനുള്ള കണക്ഷനും ഉണ്ടായിരിക്കണമെന്നതാണ് മിഷന്‍റെ ലക്ഷ്യം. നന്നായി പരിപാലിക്കപ്പെടുന്ന പാര്‍ക്ക് പോലെയുള്ള തുറസ്സായ സ്ഥലങ്ങളും പച്ചപ്പുമുള്ള നഗരങ്ങളും സ്വച്ഛമായ നഗരജീവിതവും സൗകര്യങ്ങളും നഗരവാസികള്‍ക്ക് നല്‍കി പൊതുഗതാഗതം കൂടുതലായി ഉപയോഗപ്പെടുത്തി മലിനീകരണം കുറയ്ക്കുകയും യന്ത്രശക്തി കൊണ്ടല്ലാതെ ഓടുന്ന വാഹനങ്ങള്‍ (ഉദാ. നടത്ത, സൈക്കിള്‍)ക്കായുള്ള സൗകര്യങ്ങള്‍ നിര്‍മ്മിച്ച് പ്രോത്സാഹിപ്പിക്കുകയും മിഷന്‍റെ ലക്ഷ്യങ്ങളില്‍പ്പെടുന്നു. ജലവിതരണത്തിനാണ് മിഷന്‍ മുന്‍ഗണന നല്‍കുന്നത്. അതിനു ശേഷം മലിനജലത്തിനും പ്രാധാന്യം നല്‍കുന്നു.

ജലസ്രോതസുകളുടെ പുനരുജ്ജീവനം, പച്ചപ്പുകള്‍, പാര്‍ക്കുകള്‍ എന്നിവയും ഇതിന്‍റെ ഭാഗമാണ്. അമൃത് 2.0യുടെ പ്രധാനപ്പെട്ട സവിശേഷത അനന്തരഫലത്തെ അടിസ്ഥാനപ്പെടുത്തിയിട്ടുള്ള ഫണ്ടിംഗാണ് (ഔട്ട്കം ബേസ്ഡ് ഫണ്ടിംഗ്) അമൃത് മിഷനു കീഴിലുള്ള പദ്ധതികള്‍ക്കാവശ്യമായ ഫണ്ട് കേന്ദ്രവും സംസ്ഥാനങ്ങളും, യൂണിയന്‍ ഭരണ പ്രദേശങ്ങളും നഗര തദ്ദേശസ്ഥാപനങ്ങളും ചേര്‍ന്ന് വഹിക്കുന്നു.  അമൃത് 1.0യ്ക്ക് കീഴിലുള്ളവയാണ് തിരുവനന്തപുരം, കൊച്ചി, തൃശ്ശൂര്‍, കോഴിക്കോട്, കണ്ണൂര്‍ കോര്‍പ്പറേഷനുകളും ആലപ്പുഴ, ഗുരുവായൂര്‍, പാലക്കാട് മുന്‍സിപ്പാലിറ്റികളും. കേരളത്തിലെ 93 നഗര തദ്ദേശസ്ഥാപനങ്ങളും അമൃത് 2.0യില്‍ ഉള്‍പ്പെട്ടിട്ടുള്ളവയാണ്. നഗര തദ്ദേശ സ്ഥാപനങ്ങളിലെ മലിനജല കക്കൂസ് മാലിന്യങ്ങള്‍ അമൃത് 1.0യിലാണ് ഉള്‍പ്പെട്ടിട്ടുള്ളത്.